ប៉េប៉េអឹមចូលរួមពិព័រណ៍ PharmagoraPlus ២០២៥
កាលបរិច្ឆេទ: ០៩ មេសា ២០២៥ / សុខភាព / Author : ATH Sokren
ក្រោមការដឹកនាំរបស់លោកឧកញ៉ាឱសថបណ្ឌិតហៃ លីអ៊ាងសហគ្រាសផលិតឱសថប៉េប៉េអឹម បានចូលរួមពិព័រណ៍ Pharmagora Plus លើកទី៣៨ ដែលជាពិព័រណ៍ឱសថស្ថានដ៏ធំជាងគេនៅទីក្រុងប៉ារីស កាលពីថ្ងៃទី៨ និងថ្ងៃទី៩ នៅ Porte de Versailles និងមានអ្នកជំនាញផ្នែកឱសថស្ថានរាប់ពាន់នាក់ចូលរួម។
អ្នករៀបចំបានឱ្យដឹងថា ឆ្នាំនេះមានអ្នកចូលរួមក្នុងពិព័រណ៍មិនតិចជាង៨០០០នាក់ឡើយក្នុងរយៈពេលពីរថ្ងៃ ក្នុងនោះអ្នកចូលរួមជាង៥៤០០នាក់គឺជាឱសថការី។ អ្នករៀបចំពិព័រណ៍សម្តែងក្តីរំភើបយ៉ាងដូច្នេះ៖ «បើមើលទៅលើការកើនឡើង៥%នៃចំនួនឱសថការីក្របខ័ណ្ឌធៀបទៅនឹងឆ្នាំ២០២៤ និងអត្រាពេញចិត្តនៃអ្នកចូលរួមកើនឡើង៩៤%នោះ យើងអាចនិយាយបានថា ពិព័រណ៍ឆ្នាំនេះទទួលបានជោគជ័យយ៉ាងខ្លាំង!»។
សម្រាប់អ្នកស្រី Coumba Diallo នាយកផ្នែកនាំចេញនៃសហគ្រាសផលិតឱសថប៉េប៉េអឹមនៅបណ្តាប្រទេសអាហ្រ្វិកនិយាយភាសាបារាំង ពិព័រណ៍មួយនេះគឺជាឱកាសដ៏ល្អមួយ «សម្រាប់ជួបជាមួយឱសថការីមកពីបណ្តាប្រទេសនានានៃទ្វីបអាហ្រ្វិក ដែលអាចឈានទៅបង្កើតភាពជាដៃគូជាមួយក្រុមការងាររបស់សហគ្រាសដែលមានវត្តមាននៅបណ្តាប្រទេសរបស់ពួកគេ នៅពេលដែលពួកគេត្រឡប់ទៅប្រទេសវិញ»។
ឆ្នាំនេះពិព័រណ៍ចាប់ផ្តើមនៅចំថ្ងៃទី៨ មីនា ដែលជាទិវាសិទ្ធិនារីអន្តរជាតិ។ ដោយហេតុដូច្នេះហើយទើបកម្មវិធី «សុខភាពស្រ្តី» ត្រូវបានបង្កើតឡើងជាលើកដំបូង។
អ្នករៀបចំបានកត់សម្គាល់ថា ភាពចម្រុះនៃអ្នកតាំងពិព័រណ៍ គុណភាពនៃសន្និសីទ ការផ្តោះប្តូរបទពិសោធន៍គ្នាទៅវិញទៅមកយ៉ាងសម្បូរបែប និងបរិកាសដ៏ស្និទ្ធស្នាល និងសប្បាយរីករាយនៃព្រឹត្តិការណ៍នេះ ទទួលបានការសាទរពីសំណាក់អ្នកចូលរួម។
ពិព័រណ៍ឆ្នាំនេះទទួលបានចំណាប់អារម្មណ៍ជាពិសេសលើសន្និសីទនានា។ កម្មវិធី «សុខភាពស្រ្តី» និងកម្មវិធី «ការសិក្សាពីរោគសើស្បែក» ត្រូវបានបង្ហាញជាលើកដំបូង និងទទួលបានអ្នកចួលរួមយ៉ាងច្រើន។ នេះសបញ្ជាក់ឱ្យឃើញពីការកើនឡើងនៃចំណាប់អារម្មណ៍លើប្រធានបទមួយចំនួនដូចជា ការប្រើប្រាស់ឱសថនៅមន្ទីរពេទ្យកុមារ និងជំងឺសើស្បែកសំខាន់ៗ។
បើនិយាយពីអ្នកចូលរួមតាំងពិព័រណ៍ ឆ្នាំនេះមានការចូលរួមពីសំណាក់ក្រុមហ៊ុនសហគ្រាសផលិតឱសថ និងក្រុមហ៊ុនចែកចាយឱសថធំៗ និងស្ថាប័នជំនាញផ្នែកប្រព័ន្ធឌីជីថលនៅតាមឱសថស្ថាន អ្នកជំនាញផ្នែកអាហារបំប៉ន ផ្នែកមនុស្សយន្ត និងផ្នែកគ្រឿងសម្អាងជាដើម។ វត្តមានរបស់ក្រុមហ៊ុនដែលទើបបង្កើតថ្មី និងក្រុមហ៊ុនវ័យក្មេងប្រកបដោយភាពច្នៃប្រឌិតដែលមានសក្កានុពលអភិវឌ្ឍខ្លាំង បាននាំមកនូវវាយោថ្មីនៅសាលតាំងពិព័រណ៍។
អ្នករៀបចំពិព័រណ៍វាយតម្លៃថា៖ «ក្នុងរយៈពេលពីរថ្ងៃ ពិព័រណ៍ឱសថស្ថាននៅប្រទេសបារាំងបានប្រមូលផ្តុំតួអង្គសំខាន់ៗនៃឧស្សាហកម្មឱសថជាថ្មីម្តងទៀត ដើម្បីពិភាក្សាគ្នាជុំវិញគោលដៅរួមគឺ ប្រមើលមើលពីឱសថស្ថាននៅថ្ងៃអនាគត»។ សម្រាប់ពួកគេ ការបញ្ចេញយោបល់យ៉ាងសកម្មនៅលើបណ្តាញសង្គមក្រោយពីព្រឹត្តិការណ៍ពិព័រណ៍ត្រូវបានបញ្ចប់ (មានសារជាង៣០០ក្នុងរយៈពេលមួយអាទិត្យនៅលើ LinkedIn) បានធ្វើឱ្យពិព័រណ៍នៅតែមានថាមពល និងសបញ្ជាក់ឱ្យឃើញថា ពិព័រណ៍ Pharmagora Plus បានជំរុញឱ្យមានភាពច្នៃប្រឌិត និងកិច្ចសហប្រតិបត្តិការសម្រាប់ភាគីពាក់ព័ន្ធក្នុងវិស័យឱសថស្ថាន។ ពិព័រណ៍លើកក្រោយនឹងប្រព្រឹត្តទៅនៅថ្ងៃទី១៤ និងទី១៥ មីនា ឆ្នាំ២០២៦៕
